ABŞ Dövlət Departamenti bildirib ki, prezident Donald Tramp Ukraynada müharibənin başa çatdırılması ilə bağlı baxışlarını reallaşdırmaq üçün qətiyyətlə və aqressiv şəkildə hərəkət etməyə hazırlaşır.
Bu barədə ABŞ Dövlət Departamentinin mətbuat katibi Təmmi Bryus brifinq zamanı bəyan edib, xəbər verir Daylinews-az.com.
“Düşünürəm ki, prezident bu qərarları verəcək şəxsdir və o, bu münaqişənin (red. – Rusiyanın Ukraynaya qarşı müharibəsi) başa çatdırılması ilə bağlı baxışlarını reallaşdırmaq üçün aqressiv yanaşmasını davam etdirir”, – deyə Təmmi Bryus bildirib.
O həmçinin vurğulayıb ki, Tramp vəziyyəti “kifayət qədər şəffaf” qiymətləndirir və səbir nümayiş etdirir, lakin Ukraynanın müdafiə qabiliyyətinin dəstəklənməsi üzrə NATO qarşısında öhdəliklərinə sadiq qalacaq.
Tramp Putinə 50 gün vaxt verib
Qeyd edək ki, Donald Tramp Rusiya prezidenti Vladimir Putinə qarşı sərt tədbirlər görəcəyi ilə hədələyib. Səbəb – Kremlin müharibəni dayandırmaqdan imtina etməsidir.
Tramp bəyan edib ki, əgər 50 gün ərzində sülh sazişi əldə olunmasa, Rusiyanı dəstəkləyən ölkələrə qarşı 100%-lik ikincil tariflər tətbiq ediləcək.
