Vatikan ciddi maliyyə böhranı yaşayır və bu, işçilərin pensiya öhdəliklərinin yerinə yetirilməsini təhlükə altına qoyur. Daylinews-az xəbər verir ki, 2022-ci ilə olan məlumata görə, Müqəddəs Taxt-Tacın pensiya fondunun çatışmazlığı 631 milyon avro təşkil edib. Vatikan şəhər-dövləti və Roma vikariatının maliyyə hesabatları da nəzərə alınarsa, ümumi çatışmazlıq 1 milyard avronu ötüb.
Roma Papası Fransisk pensiya fondunun dayanıqlılığı ilə bağlı narahatlığını ifadə edib və onun sabitliyini təmin etmək üçün təcili struktur islahatlarının zəruriliyini vurğulayıb. Papa qeyd edib ki, hazırkı sistem gələcək nəsillər qarşısında öhdəlikləri orta perspektivdə yerinə yetirə bilmir.
Maliyyə böhranının həlli üçün Papa Fransisk kardinal Kevin Farrollu pensiya fondunun yeganə rəhbəri təyin edib. Kardinal Farrolla islahatların hazırlanması və həyata keçirilməsi tapşırılıb.
Vatikanın maliyyə problemlərini dərinləşdirən amillərdən biri də inananlardan gələn ianələrin azalmasıdır. Müqəddəs Taxt-Tac tərəfindən aparılan islahatlara və maliyyə idarəçiliyinə etimadın azalması ianə səviyyəsinin enməsinə səbəb olub ki, bu da Vatikanın büdcəsinə və sosial öhdəliklərinin icrasına mənfi təsir göstərir.
Böhranın aradan qaldırılması üçün Vatikan şəffaflıq və maliyyə idarəçiliyinin səmərəliliyini artırmaqla yanaşı, inanclı insanlar və donorlar arasında etimadı bərpa etməyə yönəlmiş kompleks islahatlar həyata keçirməlidir.
