Videooyunların uşaqlar üçün zərərli olduğu uzun müddət düşünülürdü, amma yeni genişmiqyaslı araşdırma bunun əksini göstərdi. Nəticələrə görə, daha çox oyun oynayan uşaqların IQ səviyyəsi 2 il ərzində orta hesabla 2,5 bal artıb.
Araşdırma ABŞ-da 9–10 yaşlarında olan təxminən 10 min uşaq üzərində aparılıb. Niderland, Almaniya və İsveçdən alimlər uşaqların ekran qarşısında keçirdiyi vaxtı izləyərək, iki ildən sonra onların kognitiv test nəticələrini müqayisə ediblər.
Yoxlanılan bacarıqlar:
- mətnləri anlama
- məkan təfəkkürü
- yaddaş və düşüncə elastikliyi
- özünü idarəetmə qabiliyyəti
Nəticələr göstərib ki, televizora baxmaq və sosial şəbəkələrdə ünsiyyət intellektə nə müsbət, nə də mənfi təsir göstərir.
İsveçli neyroalim Torkel Klinqberq qeyd edir: “Nəticələrimiz təsdiqləyir ki, ekran vaxtı intellektə zərər vurmur, videooyunlar isə hətta onu inkişaf etdirə bilər”.
Hərçənd araşdırma oyun növlərini (telefon və ya konsol) fərqləndirməyib və onların yuxu, fiziki aktivlik və ya təhsilə təsirini öyrənməyib, amma bu nəticələr videooyunların “ağılı zəiflətməsi” barədə məşhur mifə qarşı çıxır.
Alimlər bildirirlər ki, intellekt sabit bir göstərici deyil, mühitin təsiri ilə dəyişə bilər və videooyunlar bu baxımdan gözlənilməz dərəcədə faydalı amil ola bilər.
