Bu gün Azərbaycanda təşkil olunan III MDB Oyunları səkkiz fərqli idman növü üzrə maraqlı və gərgin qarşılaşmalarla davam edir. Qəbələ Olimpiya Kompleksində stolüstü tennisçilər həlledici oyunlarda qüvvələrini sınayacaq.
Futbol həvəskarları üçün Qəbələdə 16 yaşadək milli komandaların qarşılaşmaları baş tutacaq. Bu gün B qrupunda Belarusla Özbəkistan, A qrupunda isə Qırğızıstan və Tacikistan üz-üzə gələcək. Stend atıcılığı üzrə təsnifat və final raundları Qəbələ Atıcılıq Klubunda təşkil olunacaq.
Gəncə İdman Sarayında üzgüçülük yarışları davam edəcək, həmçinin burada voleybol turniri başlayacaq. A qrupunda Azərbaycan və Tacikistan, B qrupunda isə Belarus və Qırğızıstan komandaları qarşılaşacaq. Göygöl Olimpiya Kompleksində bu gün sambo üzrə ən güclülər müəyyənləşəcək.
Şərqdə isə Yevlax Olimpiya İdman Kompleksində boks, Mingəçevir Kür Olimpiya Mərkəzində isə taekvondo yarışlarına start verilir.
III MDB Oyunları oktyabrın 8-də başa çatacaq və yarışlarda 13 ölkədən 1 624 idmançı, həmçinin 2 337 nümayəndə iştirak edir. Azərbaycanın heyəti 340 nəfərdən ibarətdir. Digər iştirakçı ölkələr arasında Rusiya, Özbəkistan, Belarus, Qazaxıstan və digər region dövlətləri var.
