Şimali Avropanın dəniz sərhədlərində təhlükəsizliyi gücləndirmək məqsədilə 10 Avropa dövləti, o cümlədən Böyük Britaniya vahid hərbi dəniz qüvvələrinin yaradılması barədə ortaq qərara gəliblər. Bu addım həm də regionda NATO donanmasının fəaliyyətinə əlavə dəstək vermək niyyəti daşıyır.
“The Guardian” qəzetinin verdiyi xəbərə görə, Böyük Britaniya Kral Donanmasının rəhbəri Qvin Cenkins yeni hərbi dəniz birliyinin qurulduğunu rəsmən elan edib. O, bu qərarın şimal sularından gələ biləcək potensial təhdidlərin qarşısının alınması üçün strateji əhəmiyyət kəsb etdiyini bildirib.
Cenkinsin fikrincə, beynəlxalq dəniz qüvvələrinin formalaşdırılması mümkün hərbi əməliyyatlar zamanı qoşunların əlaqələndirilməsini və hazırlıq imkanlarını əhəmiyyətli dərəcədə artıracaq. Fövqəladə vəziyyət yaranarsa, bu vahid qüvvələrin komandanlığı birbaşa Böyük Britaniya Silahlı Qüvvələrinin Baş Qərargahı tərəfindən həyata keçiriləcək.
Layihənin maraqlı tərəflərindən biri ABŞ-nin bu hərbi blokda yer almayacağıdır. Bununla belə, Kanadanın birliyə qoşulma ehtimalı hazırda müzakirə mövzusudur.
Digər tərəfdən, Rusiya tərəfi Avropanın bu addımlarına fərqli yanaşma nümayiş etdirir. Rusiya Prezidenti yanında Vətəndaş Cəmiyyəti və İnsan Hüquqları Şurasının sədri Valeri Fadeyev bildirib ki, Qərb ölkələri Rusiyanın real müharibə niyyətinin olmadığını əslində yaxşı bilirlər. Onun sözlərinə görə, Qərbin əsas narahatlığı Rusiyadan gələn hərbi təhlükə deyil, dünyada formalaşan yeni və alternativ nizamın yarada biləcəyi rəqabətdir.
