Niderlandın aparıcı bank qruplarından biri olan ING Group Azərbaycanda iqtisadi artımın növbəti illərdə sabit qalacağını proqnozlaşdırır. Bankın yaydığı hesabatda ölkənin ümumi daxili məhsulunun (ÜDM) artım tempinin 2–3% aralığında davam edəcəyi qeyd olunub.
Daylinews-azın məlumatına görə, hesabatda istehlak sektorundakı əhval-ruhiyyənin müsbət olduğu vurğulanır. Bu optimizmin əsas səbəbləri kimi əhalinin real gəlirlərində və məşğulluqda davamlı artım, eləcə də pərakəndə kreditləşmənin sürətli genişlənməsi göstərilir.
Hesabata əsasən, daxili pərakəndə kreditlərin həcmi hazırda ÜDM-in 14%-nə (qeyri-neft ÜDM-nin isə 23%-nə) bərabərdir. Müqayisə üçün, 2022-ci ildə bu göstərici müvafiq olaraq 8% və 17% idi. Lakin 2024-cü ilin əvvəlində 23% olan illik real artım tempi hazırda 15–16% səviyyəsinə qədər enib.
Bununla yanaşı, korporativ kreditləşmə sahəsində ciddi yavaşlama müşahidə edilir. 2024-cü ildə bu sahədəki zəifləmə bank sektorunda daha ehtiyatlı davranışla izah olunur. Bununla belə, daxili korporativ kreditlərin ÜDM-də payı 10% (qeyri-neft ÜDM-də 16%) təşkil etsə də, bu göstərici iqtisadi aktivliyin ümumi zəifləməsi kimi dəyərləndirilmir.
Hesabatda həmçinin qeyd olunur ki, sənaye inam indeksləri sabitliyini qoruyur. Neft sektorundakı zəifliyə baxmayaraq, bu tendensiyanın davam etməsi Azərbaycanın fiskal siyasətinə dair nikbin gözləntilərlə əlaqələndirilir.
