Bu il ali məktəblərə qəbul olmaq istəyən abituriyentlər üçün nisbətən əlverişli vəziyyət yarana bilər. Təhsil üzrə ekspertlərin fikrincə, 2026-cı ildə qəbul imtahanlarının nəticələri fonunda keçid ballarında eniş gözlənilir.
Təhsil eksperti Ramin Nuralıyevin sözlərinə görə, son açıqlanan buraxılış imtahanlarının nəticələri əvvəlki illərlə müqayisədə daha zəifdir və bu, qəbul prosesinə birbaşa təsir göstərəcək.
İmtahan nəticələri əvvəlki illərlə müqayisədə aşağıdır
Ekspert qeyd edib ki, I zona üzrə 11-ci sinif buraxılış imtahanlarının nəticələri göstərir ki, bu il imtahanlar daha çətin olub:
“2025-ci ildə I zona üzrə maksimum bal toplayanların sayı 23 nəfər idi. Bu il isə bu göstərici cəmi 2 nəfərdir. Bu fərq açıq şəkildə göstərir ki, builki imtahan daha çətin keçib”.
Onun sözlərinə görə, martın 15-də keçirilən imtahanın nəticələrinə əsasən, maksimum – 300 bal toplayanların ümumi sayı təxminən 5 nəfər ola bilər. Halbuki ötən il bu göstərici 45 nəfər təşkil edirdi.
Eyni zamanda, martın 9-da keçirilən buraxılış imtahanında iki nəfər – Abşeron rayonu Ceyranbatan qəsəbə 1 nömrəli məktəbin məzunu Həsənli Aydın Çingiz oğlu və Bakı şəhəri 289 nömrəli məktəbin (Zəngi liseyi) məzunu Qurbanov Məhəmmədəli Əhməd oğlu maksimum nəticə göstərərək 300 bal toplayıblar.
Keçid balları necə dəyişə bilər?
Ramin Nuralıyev bildirib ki, buraxılış imtahanlarının çətinliyi qəbul mərhələsində də öz təsirini göstərəcək. Hətta blok imtahanlarının səviyyəsi ötən ilki kimi qalsa belə, ümumi nəticələr aşağı olduğuna görə keçid ballarında azalma qaçılmazdır:
“Bu il keçid ballarının təxminən 30-50 bal arası aşağı düşməsi mümkündür. Bu tendensiya həm kolleclərə, həm də V ixtisas qrupuna qəbul zamanı özünü göstərəcək”.
Ekspert əlavə edib ki, nəticələrin aşağı olması ümumi rəqabət mühitini də dəyişir və abituriyentlər üçün daha əlverişli imkan yaradır. Bununla yanaşı, bəzi ixtisaslar üzrə bal fərqləri daha kəskin hiss oluna bilər.
