Oktyabrın 1-dən etibarən ölkədə məktəb avtobusları layihəsi tətbiq olunmağa başlayacaq.
Elm və təhsil naziri Emin Əmrullayevin sözlərinə görə, layihənin ilkin mərhələsində təxminən 1 200 şagird əhatə olunacaq. Nazir bildirib ki, bu təşəbbüs dövlət və özəl sektorun birgə əməkdaşlığı əsasında həyata keçirilir.
E.Əmrullayev layihənin məqsədini belə izah edib:
- Şagirdlərin məktəbə təhlükəsiz və rahat daşınmasını təmin etmək
- Xüsusilə şəhər mərkəzində yerləşən və daha çox təsir gücünə malik məktəbləri layihəyə cəlb etmək
- Yol hərəkətində tıxacların azalmasına töhfə vermək
Nazirin sözlərinə görə, ilkin mərhələdə dövlət subsidiya və dəstək mexanizmləri ilə prosesdə iştirak edəcək. Lakin şagird sayı artdıqca, ödənişlərin valideynlər tərəfindən qarşılanması nəzərdə tutulur. O əlavə edib ki, şagirdlərin sayı artdıqca qiymətlər də optimallaşdırılacaq.
Emin Əmrullayev vurğulayıb ki, bu layihə təhsil və nəqliyyat sahəsində innovativ yanaşmanın nümunəsi olmaqla, gələcəkdə daha geniş şəkildə tətbiq edilə bilər.
