Rəqəmsal İnkişaf və Nəqliyyat Nazirliyinin Kollegiyası tərəfindən avtobus marşrutları və metroda sərnişindaşımaya tətbiq ediləcək yeni tariflər təsdiqlənib. Yeni qiymətlər oktyabrın 1-dən qüvvəyə minəcək. Buna əsasən:
Metroda bir dəfə gedişin qiyməti 60 qəpik olacaq;
Müasir tələblərə cavab verən, yalnız nağdsız ödəniş qəbul edən şəhərdaxili, rayondaxili, qəsəbələrarası və şəhərətrafı avtobuslar üçün minimum tarif 60 qəpikdən başlayacaq (məsafəyə görə dəyişiklik olacaq).
Sosioloq Üzeyir Şəfiyev a açıqlamasında bildirib ki, nəqliyyat tariflərinin artırılması zamanı ilk növbədə insanların sosial və iqtisadi imkanları nəzərə alınmalıdır. Onun sözlərinə görə, az gəlirli təbəqə daha çox ictimai nəqliyyatdan istifadə edir və qiymət artımı onların gündəlik həyatına mənfi təsir göstərə bilər.
Şəfiyev əlavə edib ki, sərnişindaşımada qiymət artımı sərnişinləri taksi və şəxsi avtomobil seçimlərinə yönləndirə bilər. Bu isə tıxacların və xərclərin artmasına səbəb olur. Müasir şəhər idarəçiliyinin əsas məqsədlərindən biri ictimai nəqliyyatdan istifadənin artırılması, şəxsi avtomobillərə tələbatın azaldılmasıdır.
Sosioloq vurğulayıb ki, qiymət artımı yalnız iqtisadi baxımdan deyil, sosial, ekoloji və şəhərsalma aspektlərindən də dəyərləndirilməlidir. Əgər ictimai nəqliyyat əlçatan olmazsa, bu həm sosial ədalət hissinə, həm də şəhər həyatının keyfiyyətinə mənfi təsir göstərər.
Nəticədə, belə qərarlar qəbul edilərkən vətəndaşların maddi imkanları və şəhərin davamlı inkişaf maraqları diqqətlə nəzərə alınmalıdır.
