Payız-qış mövsümünün yaxınlaşması ilə əlaqədar Səhiyyə Nazirliyi qrip və digər respirator virus infeksiyalarına qarşı profilaktik tədbirləri gücləndirir. Nazirliyinin verdiyi rəsmi məlumata görə, ölkəyə qrip əleyhinə “Sanofi Pasteur” şirkətinin istehsalı olan yeni vaksinlər gətirilib. Bu preparatlar tam təhlükəsiz və yüksək keyfiyyətli hesab olunur.
Səhiyyə naziri Teymur Musayevin müvafiq əmrinə əsasən, oktyabrın 8-dən etibarən ölkədə qrip əleyhinə vaksinasiyaya başlanılacaq. Xüsusən, səhiyyə işçilərinə, hamilə qadınlara və xroniki tənəffüs sistemi xəstəlikləri olan 6 ay və daha böyük körpələrə bu vaksinin qəbulu məsləhət görülür.
Vaksinasiya dövlət poliklinikaları və ambulator tibb müəssisələrində tam ödənişsiz həyata keçiriləcək və hər kəs yaşayış və ya iş yeri üzrə bu xidmətdən yararlana biləcək.
Səhiyyə Nazirliyi vətəndaşlara sağlamlıqlarını qorumaq və mövsümi respirator xəstəliklərin yayılmasının qarşısını almaq üçün qabaqlayıcı peyvənd olunmağa çağırıb.
