İyulun 5-də Filadelfiyadakı Lincoln Financial Field stadionunda keçirilən qarşılaşmada Fransa millisi Paraqvayla gərgin mübarizə aparıb. Komandalar uzun müddət hesabı aça bilməsələr də, oyunun taleyi ikinci hissədə həll olunub.
70-ci dəqiqədə təyin olunan penalti zərbəsini dəqiq yerinə yetirən Kilian Mbappe fransızlara minimal hesablı qələbə qazandırıb. Bu nəticə ilə Didye Deşamın yetirmələri 1/4 finala yüksələrək növbəti rəqibini gözləməyə başlayıb.
Unahinin dubli Mərakeşi növbəti mərhələyə daşıdı
İyulun 4-də Hyustondakı NRG Stadium arenasında baş tutan digər 1/8 final görüşündə Mərakeş millisi Kanada yığmasına 3 cavabsız qolla qalib gəlib.
İlk hissə qolsuz başa çatsa da, fasilədən sonra Afrika təmsilçisi üstünlüyünü tam nümayiş etdirib. Azzəddin Unahi 50-ci dəqiqədə hesabı açıb, 82-ci dəqiqədə isə dubla imza ataraq komandasının üstünlüyünü möhkəmləndirib. Qarşılaşmanın əlavə olunmuş vaxtında Əşrəf Rahimi də fərqlənərək yekun nəticəni müəyyənləşdirib.
Bu qələbədən sonra Mərakeş 1/4 finalda Fransa ilə üz-üzə gələcək və beləliklə, mundialın ilk dörddəbir final cütlüyü rəsmiləşib.
