Portuqaliyanın Gondomar şəhərində iyulun 6-da baş tutan dəfn mərasimində minlərlə insan avtomobil qəzasında həlak olan Diogu Jota və onun qardaşı Andre Silva ilə vidalaşmaq üçün bir araya gəldi. Faciə 3 iyul gecəsi İspaniyada baş verib.
Mərasimə “Liverpul” klubunun futbolçuları və məşqçilər heyəti qatılıb. Klubun kapitanı Virgil van Deyk əlində Jotanın “20” nömrəli formasını simvolizə edən qırmızı güllərdən hazırlanmış kompozisiya daşıyırdı. Andrew Robertson isə Andre Silvanın “30” nömrəli formasına uyğun hazırlanmış gül çələngi ilə iştirak etdi.
Mərasimdə Portuqaliya yığmasının əsas oyunçuları — Bernardo Silva, Ruben Dyaş və Ruben Neves də iştirak etdilər. Neves xüsusi olaraq ABŞ-dan — “Əl-Hilal”la birlikdə Klub Dünya Çempionatında çıxış etdikdən sonra mərasimə qatılmaq üçün geri dönmüşdü.
GOAL nəşrinin məlumatına görə, kilsənin qarşısında yüzlərlə insan — ailə üzvləri, keçmiş komanda yoldaşları, dostlar və sadə azarkeşlər toplaşmışdı. Kilsənin içərisi tam dolu olduğundan, çox sayda insan mərasimi çöldən izləməli oldu.
“Liverpul” klubunun rəsmi bəyanatında Diogu Jotanın ölümü “dəhşətli itki” kimi qiymətləndirildi.
