Bakıda sökülməsi nəzərdə tutulan binaların sakinlərinə kompensasiyaların verilməsi məsələsi Maliyyə Nazirliyi tərəfindən bazar qiymətlərinə uyğun tənzimlənir.
Bu barədə Report-a Bakı Şəhər İcra Hakimiyyətinin başçısı Eldar Əzizov məlumat verib.
Əzizovun sözlərinə görə, köhnə binalar sökülür, onların yerində yeni binalar tikilir ki, bu da paytaxtın genişlənməsinə və daha da cəlbedici olmasına səbəb olur.
Qeyd edək ki, Bakıda sökülməsi nəzərdə tutulan 130 binadan 65-nin sənədləri artıq inventarlaşdırılma üçün Şəhərsalma və Arxitektura Dövlət Komitəsinə təqdim edilib.
Birinci mərhələdə Binəqədi, Xətai, Nizami, Nəsimi, Sabunçu və Səbail rayonlarında binalar söküləcək. Nazirlər Kabinetinin qərarı inventarlaşdırmadan sonra elan ediləcək və bundan sonra qısa müddətdə söküntü işlərinə başlanılacaq.
Bu prosesə Nazirlər Kabineti, Bakı Şəhər İcra Hakimiyyəti və digər qurumların nümayəndələrindən ibarət işçi qrupu rəhbərlik edəcək.
İkinci mərhələdə 60-dan çox bina söküləcək və onların yerində yeni binalar tikiləcək. Tikinti şirkətləri ilə danışıqlar aparılır.
