Fransanın tanınmış siyasətçisi və “Milli Birlik” partiyasının lideri Marin Le Pen Paris məhkəməsinin qərarı ilə Avropa İttifaqına məxsus vəsaitlərin mənimsənilməsi işində təqsirli bilinib. Məhkəmə qərarına əsasən, o, beş il müddətinə seçkili vəzifələrə namizədliyini irəli sürə bilməz. Bu qərar dərhal qüvvəyə minib və Le Pen-in 2027-ci il prezident seçkilərində iştirakına mane olur.
İstintaqın gəldiyi nəticəyə görə, Marin Le Pen və daha səkkiz Avropa Parlamenti deputatı Avropa qurumlarında formal şəkildə köməkçi kimi qeydiyyata alınmış şəxslər vasitəsilə partiya maraqlarına xidmət edən vəsaitlərdən istifadə ediblər. Ümumilikdə 12 köməkçi də bu sxemə cəlb olunub və onlar “oğurlanmış vəsaitlərin faydalı istifadəçiləri” kimi tanınıblar. Məhkəmənin hesablamalarına görə, Avropa Parlamenti bu səbəbdən 2,9 milyon avro zərərə uğrayıb.
Fransa mediası – o cümlədən Le Figaro, Le Monde və BFMTV – məhkəmənin qərarını ətraflı işıqlandırıb. Verilən məlumatlara görə, Le Pen dörd il müddətinə azadlıqdan məhrum edilib. Bu müddətin iki ili real cəza formasındadır, lakin o, bu cəzanı ev şəraitində elektron qolbaqla çəkə biləcək. Bundan əlavə, ona 100 min avro cərimə kəsilib.
Qeyd edək ki, bu hüquqi proses 2024-cü il sentyabrın 30-da Parisdə başlayıb və məqsədi Avropa Parlamentinin vəsaitlərindən qanunsuz istifadə iddialarını araşdırmaq olub. Əgər Le Pen apellyasiya şikayəti versə belə, hazırkı məhdudiyyətlər hələlik qüvvədə qalacaq.
