2026-cı ilin mart ayında Azərbaycanda rəsmi bayram və istirahət günləri ilə əlaqədar ümumilikdə 13 qeyri-iş günü planlaşdırılıb.
Qadınlar Günü ilə bağlı qeyri-iş günləri
8 Mart – Beynəlxalq Qadınlar Günü bazar gününə düşdüyünə görə, Əmək Məcəlləsinə uyğun olaraq növbəti gün, yəni 9 mart da qeyri-iş günü kimi müəyyən olunub. Beləliklə, ayın əvvəlində ardıcıl 2 gün – 8 və 9 mart tarixləri iş günü sayılmayacaq.
Novruz və Ramazan bayramları: 11 günlük fasilə
Nazirlər Kabinetinin qərarına əsasən, 2026-cı ildə:
- 20, 21, 22, 23, 24 mart – Novruz bayramı günləri;
- 20 və 21 mart – Ramazan bayramı günləri kimi təsdiqlənib və bu tarixlər iş günü hesab edilmir.
21 və 22 mart tarixləri müvafiq olaraq şənbə və bazar günlərinə düşdüyündən, Əmək Məcəlləsinin 105-ci maddəsinə əsasən, 25 və 26 mart da əlavə istirahət günü kimi təqvimə daxil edilib. Ramazan bayramı günlərinin Novruz tətili ilə üst-üstə düşməsi səbəbindən 27 və 30 mart tarixləri də qeyri-iş günü elan olunub. 28 və 29 mart həftəsonu olduğuna görə, martın 20-dən 30-na qədər (hər iki gün daxil) ölkə üzrə ardıcıl 11 gün iş olmayacaq.
Nəticə etibarilə, mart ayında cəmi 13 qeyri-iş günü olacaq: 8, 9 mart, həmçinin 20–30 mart tarixləri.
