Roma Papası Fransiskin simvolik üzüyü yaxın günlərdə rəsmi şəkildə məhv ediləcək. Bu, Roma Katolik Kilsəsinin yüzilliklər boyu davam edən dini ənənələrindən biridir və sırf formal yox, həm də mənəvi məna daşıyır.
Məlumata görə, bu qızıldan hazırlanmış “balıqçının üzüyü” pontifikat dövründə Papa tərəfindən istifadə olunur və onun səlahiyyətinin rəmzidir. Üzük həm də keçmişdə mühüm kilsə sənədlərinin möhürlənməsi üçün istifadə olunurdu. Papa Fransisk bu üzüyü bütün xidmət illəri boyunca sağ əlinin barmağında daşıyıb.
Ancaq Papa vəfat etdikdən sonra üzüyün taleyi dəyişir. Katolik kilsəsi qanunlarına görə, bu rəmz dərhal yox edilməlidir. Mərasim zamanı bu işi Vatikanda yüksək rütbəli dini şəxs – kamerlenq həyata keçirir. O, xüsusi çəkiclə üzüyü sındırır və bununla da Papa dövrünün rəsmi sonunu elan edir.
Bu ənənənin məqsədi:
- Papa möhürünün sui-istifadəsinin qarşısını almaq;
- Köhnə pontifikatın bağlanması və yeni dövrün başlanmasına hazırlıq;
- Dini və inzibati ardıcıllığın təmin olunmasıdır.
Qeyd edək ki, mənbələrin bildirdiyinə görə, üzüyün dəyəri 500 min ABŞ dollarını ötür və onun hazırlanmasında yüksək keyfiyyətli materiallardan istifadə olunub.
Papa Fransisk 21 aprel tarixində səhər saatlarında beyin qanaması və ürək-damar sistemi pozğunluğu səbəbindən dünyasını dəyişib. Onun ölümündən sonra, konklav adlanan yeni Papa seçki prosesi başlayacaq və bu, adətən 15–20 gün davam edir.
