Polşada keçirilən prezident seçkilərinin ikinci turunun nəticələrinə əsasən, tarixçi və siyasətçi Karol Navrotski qalib elan olunub. O, mühafizəkar mövqeyi ilə tanınan və keçmiş prezident Andjey Dudanın da üzvü olduğu “Hüquq və Ədalət” (PiS) partiyası tərəfindən dəstəklənirdi.
Rəqəmlərlə nəticələr
Polşanın Mərkəzi Seçki Komissiyasının rəsmi məlumatına əsasən, 1 iyun tarixində baş tutan ikinci turda səslərin 100%-nin hesablanması nəticəsində Navrotski 50,89% səs toplayaraq lider olub. Onun rəqibi, Varşava meri və Avropayönlü “Vətəndaş Platforması” partiyasının nümayəndəsi Rafal Tşaskovski isə 49,11% səs qazanıb.
Seçici fəallığı da yüksək olub – 71,63% vətəndaş səsvermədə iştirak edib.
İlk turda Tşaskovski öndə idi
Qeyd edək ki, 18 mayda keçirilmiş ilk turda Tşaskovski 31,4%, Navrotski isə onun cəmi 2 faizdən az gerisində idi. Seçkilərin gedişində və eksit-pol nəticələrində rəqabətin başabaş getdiyi, son nəticənin yalnız səslərin tam hesablanmasından sonra məlum olacağı proqnozlaşdırılırdı.
Kimdir Karol Navrotski?
- Polşanın Milli Yaddaş İnstitutunun direktoru;
- Siyasi baxışları mühafizəkar və milli dəyərlərə əsaslanan bir platformanı təmsil edir;
- “Hüquq və Ədalət” partiyası tərəfindən dəstəklənir;
- Yeni prezident kimi PiS-in xəttini davam etdirməsi gözlənilir.
Tşaskovskidən gözləntilər alınmadı
2018-ci ildən Varşava meri olan Rafal Tşaskovski isə liberal və Avropa İttifaqı ilə daha sıx inteqrasiya tərəfdarı kimi tanınır. Seçkiöncəsi sorğular və eksit-pollar onun minimal üstünlüyünü göstərsə də, nəticədə uduzan tərəf oldu.
