Sevgililər Günü hər il fevralın 14-də qeyd olunan və sevginin rəmzinə çevrilmiş bir bayramdır. Dünyanın bir çox ölkəsində geniş qeyd olunan bu günün kökləri qədim dövrlərə gedib çıxır. Onun tarixi müxtəlif əfsanələr və fərziyyələrlə doludur. Gəlin, bu romantik bayramın yaranma tarixinə və müxtəlif ölkələrdə qeyd olunma ənənələrinə nəzər salaq.
Sevgililər Gününün mənşəyi
Bu bayramın tarixi dəqiq bilinməsə də, ən çox qəbul edilən versiya onun III əsrdə Roma İmperiyasında yaşadığı güman edilən yepiskop Valentin ilə əlaqəli olmasıdır. O dövrdə imperator Klavdi II əsgərlərin evlənməsini qadağan etmişdi, çünki ailə qurmağın onları zəiflədəcəyini düşünürdü. Lakin Valentin gizlicə sevən cütlükləri evləndirməyə davam edib. Bu hadisə imperatorun qulağına çatdıqdan sonra yepiskop həbs edilib və 14 fevral 269-cu ildə edam olunub.
Əfsanəyə görə, edam olunmazdan əvvəl o, həbsxanada gözətçinin qızına sevgi məktubu yazıb və onu “Sənin Valentin” sözləri ilə imzalayıb. Məhz bu hadisə sonradan “valentin açıqcaları” ənənəsinin yaranmasına səbəb olub. 496-cı ildə Papa I Qelasius 14 fevralı Müqəddəs Valentin günü kimi elan edərək, qədim Roma dövründə qeyd olunan Luperkaliya adlı bütpərəst bayramı əvəz etmək məqsədini güdüb.
Sevgililər Gününün dünyada qeyd olunması
Sevgililər Günü dünyada fərqli formalarda qeyd edilir.
- Fransa – Burada sevgililər bir-birinə ən çox zərgərlik əşyaları hədiyyə edirlər.
- İtaliya – Gün “şirin bayram” adlanır və insanlar bir-birlərinə şokolad və tortlar hədiyyə edirlər.
- Finlandiya – Burada 14 fevral “Dostlar Günü” kimi qeyd edilir və yalnız sevgililərə deyil, dostlara da hədiyyələr verilir.
- Hollandiya – Qadınların sevdikləri kişilərə evlilik təklif etməsi adi hal sayılır. Əgər kişi imtina edərsə, qadına ipək paltar hədiyyə etməlidir.
- Jamaika – Bu gün burada “utancaqlıqdan qurtulma günü” kimi qəbul edilir. Adanın bəzi bölgələrində “çılpaq toylar” keçirilir.
- İran və Səudiyyə Ərəbistanı – Sevgililər Günü rəsmi olaraq qadağandır və qeyd edənlərə ciddi cəzalar tətbiq edilir.
Maraqlı faktlar
- 14 fevral eyni zamanda Beynəlxalq Kitab Hədiyyə Etmə Günü və YouTube-un yaranma günü kimi qeyd edilir.
- ABŞ-ın Nebraska ştatında “Valentin” adlı bir şəhər var. Çoxları onun bu adla məhz Sevgililər Günü şərəfinə adlandırıldığını düşünür.
- Sevgililər Gününün rəmzi qırmızı qızılgüllərdir. Əfsanəyə görə, Yunan ilahəsi Afrodita sevgilisinə tələsərkən ayağına ağ qızılgül tikanı batır və onun qanı çiçəyi qırmızıya boyayır.
- Hər il 50 milyon qızılgül Sevgililər Günündə hədiyyə edilir.
- 2009-cu ildə Meksika şəhərində eyni anda ən çox öpüşən cütlük rekordu qırılıb – 40 min insan eyni anda öpüşüb.
Nəticə
Sevgililər Günü, sevginin və dəyərin ifadə edildiyi xüsusi bir gündür. Dünyanın fərqli ölkələrində müxtəlif adətlər və inanclarla qeyd edilsə də, onun əsas mahiyyəti eynidir – insanlara sevgi və diqqət göstərmək.
