Müasir smartfonlar hər il daha güclü kameralar, sürətli prosessorlar və yüksək parlaqlığa malik ekranlarla təkmilləşsə də, batareyanın tez boşalması problemi hələ də aktualdır.
Xüsusilə işıqların planlı və fövqəladə kəsildiyi şəraitdə bu, daha kəskin hiss olunur. Hətta yeni cihazlarda belə fon tətbiqlərinin fəaliyyəti və yüksək enerji sərfi səbəbindən gündə bir neçə dəfə şarj etmək zərurəti yarana bilir.
Mütəxəssislərin sözlərinə görə, enerjidən çox istifadə həm batareyanın təbii köhnəlməsi, həm də düzgün qurulmayan sistem ayarları ilə bağlı ola bilər. İstehsalçılar bildirirlər ki, batareyanın sağlamlığı 80%-dən aşağı düşdükdə onu dəyişmək tövsiyə olunur.
Amma ayarlar optimallaşdırılmadıqda, hətta sağlam batareya belə lazımsız sərfiyyatla üzləşir. Android cihazlarda standart enerji qənaəti funksiyasından əlavə bir neçə ayar da mövcuddur ki, onlar batareyanın ömrünü nəzərəçarpacaq dərəcədə uzada bilər.
1. Always-on Display funksiyasını deaktiv edin
Smartfon kilidli vəziyyətdə olsa belə, Always-on Display funksiyası ekranda saatı, bildirişləri və digər məlumatları göstərir. Bu xüsusiyyət faydalı olsa da, enerji sərfiyatını artırır. Xüsusilə gün ərzində ekran tez-tez aktivləşirsə, batareya daha sürətlə boşalır.
Bu funksiyanı söndürmək üçün Ayarlar → Ekran bölməsinə keçmək kifayətdir. Bəzi modellərdə bu seçim “Ambient Display” və ya “Kilid ekranı ayarları” kimi qeyd olunur.
Eyni bölmədə ekranın yenilənmə tezliyini 60 Hz-ə endirmək də mümkündür. Bu, animasiyaların bir qədər az axıcı görünməsinə səbəb olsa da, batareyanın iş müddətini artırır.
2. Tünd rejimi aktiv edin
Android-də artıq standart olan tünd rejim AMOLED ekranlı cihazlarda xüsusilə effektivdir. Belə ekranlarda qara piksellər işıqlandırılmadığı üçün enerji sərf etmirlər. Nəticədə həm batareya yüklənmir, həm də gözlər daha az yorulur.
Rejimi Ayarlar → Ekran menyusundan aktiv etmək mümkündür. Bəzi cihazlar günün vaxtına uyğun olaraq avtomatik keçidi dəstəkləyir.
Bundan başqa, ekran parlaqlığını daim maksimumda saxlamaq batareyaya əlavə yük yaradır. Tətbiqlərin və mühit işığının səviyyəsinə uyğunlaşan avtomatik parlaqlıq rejimi isə daha balanslı seçimdir.
3. Fon rejimində tətbiqlərin icazələrini yoxlayın
Bir çox proqramlar arxa planda internetə qoşulur, yerlə bağlı məlumatları yeniləyir və sinxronizasiya aparır. Mesencer və naviqasiya tətbiqləri üçün bu zəruridir, amma bütün proqramların fon rejimində işləməsinə ehtiyac yoxdur.
Fon fəaliyyətini məhdudlaşdırmaq üçün:
- Ayarlar → Tətbiqlər bölməsinə daxil olun;
- siyahıdan istədiyiniz tətbiqi seçin;
- “Batareya istifadəsi” bölməsini açın;
- fon fəaliyyətinə icazəni deaktiv edin.
Eyni zamanda yerləşmə icazələrini də tənzimləmək mümkündür. Yalnız aktiv istifadə zamanı geolokasiya tələb edən tətbiqlər üçün “İstifadə zamanı icazə ver” seçimi ən optimal variantdır. Lakin xəritə və taksi tətbiqlərinin düzgün işləməsi üçün geolokasiya icazələrini tamamilə söndürmək məsləhət görülmür.
4. 5G əvəzinə 4G-dən istifadə edin
5G şəbəkələri yüksək məlumat ötürmə sürəti təqdim etsə də, batareyaya daha çox yük salır. Üstəlik, bəzi bölgələrdə 5G siqnalı sabit olmadığından cihaz tez-tez şəbəkələr arasında keçid edir və bu da enerji sərfini artırır.
Mobil internetdən gündəlik istifadə üçün 4G kifayət edir: video izləmək, oyun oynamaq və fayl yükləməkdə ciddi fərq hiss olunmur, amma batareya daha gec boşalır. Şəbəkə növünü dəyişmək üçün Ayarlar → Mobil Şəbəkə bölməsinə keçmək kifayətdir.
5. Ekranın avtomatik sönmə müddətini qısaldın
Ekran smartfonun ən çox enerji sərf edən hissəsidir. Onun uzun müddət aktiv qalması batareyanın daha tez boşalmasına səbəb olur. Ekranın avtomatik sönmə vaxtını 15–30 saniyəyə endirmək cihazın ömrünü nəzərəçarpacaq dərəcədə artırır.
Bu, xüsusilə tez-tez telefonu qoyub başqa işlə məşğul olan istifadəçilər üçün effektiv üsuldur.
Bütün bu ayarlar birgə tətbiq olunduqda, hətta köhnə cihazlarda belə batareyanın iş müddəti əhəmiyyətli dərəcədə artır. Enerjiyə qənaət təkcə şarjı uzatmaq deyil, həm də batareyanın ümumi sağlamlığını qorumağa kömək edir.
