Azərbaycanda süni intellekt texnologiyalarından istifadə etməklə saxta foto, video və audio materialların hazırlanması və yayılmasına görə daha sərt məsuliyyət tətbiq edilə bilər.
Bununla bağlı Cinayət və Cinayət-Prosessual məcəllələrinə dəyişikliklər nəzərdə tutan qanun layihəsi parlamentin Hüquq siyasəti və dövlət quruculuğu, eləcə də İnsan hüquqları komitələrinin birgə iclasında müzakirəyə çıxarılıb.
Təklif edilən dəyişikliklərə əsasən, şəxsin razılığı olmadan onun görüntüsü və ya səsindən istifadə etməklə süni intellekt və ya xüsusi proqram təminatı vasitəsilə reallığı əks etdirməyən materialların hazırlanması cinayət məsuliyyəti yaradacaq.
Belə materialların mediada, internet informasiya resurslarında və ya digər telekommunikasiya şəbəkələrində yayılması ciddi sanksiyalarla nəticələnə bilər.
Layihəyə görə, bu cür qanunsuz fəaliyyətlərə görə aşağıdakı cəzalar nəzərdə tutulur:
- 3 000 manatdan 7 000 manatadək cərimə,
- 360 saatdan 480 saatadək ictimai işlər,
- 3 ilədək azadlığın məhdudlaşdırılması,
- və ya 3 ilədək azadlıqdan məhrumetmə.
Ağırlaşdırıcı hallarda daha sərt cəzalar tətbiq ediləcək
Qanun layihəsində bəzi hallarda məsuliyyətin daha da ağırlaşdırılması nəzərdə tutulur. Əgər eyni əməl bir neçə nəfər tərəfindən, əvvəlcədən razılaşmış qrup tərəfindən və ya bir neçə şəxsə qarşı törədilərsə, həmçinin şəxsin nüfuzuna xələl gətirmək məqsədi daşıyarsa, cəza daha ağır olacaq.
Belə hallarda qanunvericilik 3 ildən 5 ilədək azadlıqdan məhrumetmə cəzasının tətbiqini nəzərdə tutur. Eyni zamanda, zərərçəkmiş şəxsin xidməti fəaliyyəti və ya ictimai vəzifəsini yerinə yetirməsi ilə əlaqədar bu cür hərəkətlərin törədilməsi də ağırlaşdırıcı hal kimi qiymətləndiriləcək.
Pornoqrafik məzmun üçün daha ciddi məsuliyyət
Qanun layihəsində süni intellekt vasitəsilə pornoqrafik və ya seksual xarakterli materialların hazırlanmasına xüsusi diqqət ayrılıb. Şəxsin razılığı olmadan onun görüntüsü və ya səsindən istifadə edilərək bu tip materialların hazırlanması və yayılması halında 3 ildən 7 ilədək azadlıqdan məhrumetmə cəzası tətbiq oluna bilər.
Bundan əlavə, süni intellekt vasitəsilə hazırlanmış foto, video və ya audio materiallar kütləvi şəkildə yayıldıqda, həmin materialların belə texnologiyalar vasitəsilə yaradıldığını göstərən açıq və aydın nişanlama ilə təqdim edilməsi də tələb olunacaq.
