Bu gün Azərbaycanın tanınmış şahmat ustalarından biri, qrosmeyster Teymur Rəcəbovun doğum günüdür. 12 mart 1987-ci ildə Bakıda dünyaya gələn məşhur şahmatçı 39 yaşını tamam edir.
Uzun illərdir beynəlxalq şahmat arenasında ölkəni uğurla təmsil edən Rəcəbov həm fərdi turnirlərdə, həm də komanda yarışlarında qazandığı nəticələrlə Azərbaycan şahmatının simvollarından birinə çevrilib.
Teymur Rəcəbov hələ yeniyetmə yaşlarında böyük uğurlara imza ataraq diqqət mərkəzinə düşmüşdü. O, cəmi 14 yaşında qrosmeyster normasını yerinə yetirərək həmin dövrdə dünyanın ən gənc qrosmeysterlərindən biri kimi tanındı.
Onun beynəlxalq şöhrəti isə 2003-cü ildə İspaniyanın Linares şəhərində keçirilən nüfuzlu turnirdə dünya çempionu Harri Kasparovu məğlub etməsindən sonra daha da artdı. Bu qələbə Rəcəbovu tarixdə dünya çempionunu məğlub edən ən gənc şahmatçılardan biri kimi tanıtdı.
Karyerasında unudulmaz nailiyyətlər
Azərbaycanlı qrosmeyster karyerası ərzində bir çox böyük uğurlar əldə edib. O, bir il ərzində üç müxtəlif FİDE dünya çempionu – Harri Kasparov, Vişvanatan Anand və Ruslan Ponomaryovu məğlub etməyi bacaran nadir şahmatçılardan hesab olunur.
Bu nəticə onun dünya şahmat elitasında mövqeyini möhkəmləndirib. Rəcəbovun ən böyük uğurlarından biri 2019-cu ildə Dünya Kubokunun qalibi olmasıdır. Həmin turnirdə qazandığı qələbə ona dünya çempionluğu uğrunda Namizədlər turnirinə vəsiqə qazandırmışdı.
Bundan başqa, o, Azərbaycan milli komandasının heyətində üç dəfə Avropa çempionu tituluna sahib olub və komanda yarışlarında ölkənin ən uğurlu şahmatçılarından biri sayılır. Hazırda da aktiv karyerasını davam etdirən Rəcəbov dünya şahmat reytinqində yüksək mövqelərdən birini qoruyur.
Onun ELO göstəricisi 2689 təşkil edir və bu nəticə onu aktiv şahmatçılar arasında ilk onluqlara yaxın mövqedə saxlayır. Təcrübəsi, strateji düşüncə tərzi və sakit oyun üslubu ilə o, yeni nəsil şahmatçılar üçün nümunə olaraq qalır.
