Bu gün Qəbələdə Azərbaycan Prezidenti İlham Əliyevin Türk Dövlətləri Təşkilatının (TDT) nümayəndələri ilə görüşü və burada keçiriləcək zirvə tədbiri Türk dünyasının inteqrasiya yolunda əhəmiyyətli mərhələyə keçidini işarələyir. Bu barədə siyasi şərhçi Ülviyyə Zülfiqar.
Ülviyyə Zülfiqar qeyd edir ki, TDT-nin XII Zirvə Görüşünün məhz Azərbaycanda baş tutması simvolik və strateji baxımdan böyük önəm daşıyır. Azərbaycan, türk mədəniyyəti, siyasi iradə və iqtisadi inkişaf baxımından bölgədə öncül mövqelərdədir. O, əlavə edir ki, enerji, nəqliyyat, təhlükəsizlik və kommunikasiya sahələrində həyata keçirilən genişmiqyaslı layihələr, xüsusilə Zəngəzur dəhlizinin açılması, türk dövlətlərinin həm fiziki, həm də iqtisadi birləşməsi üçün əlverişli şərait yaradır.
Siyasi şərhçi vurğulayır ki, türk xalqlarının ortaq mədəni kökləri XXI əsrin çağırışlarına cavab verən yeni siyasi konsepsiyaya çevrilməkdədir. Azərbaycan bu inteqrasiya prosesində əsas rol oynayır, diplomat kimi və iqtisadi təşəbbüslərlə fərqlənir. Qəbələdə keçiriləcək zirvə Türk dünyasının birgə inkişafı istiqamətində yeni strateji addımların atılacağı məkan olacaq.
Ülviyyə Zülfiqar əlavə edib ki, TDT yalnız regional deyil, beynəlxalq siyasətdə də mühüm tarazlıq rolunu oynaya biləcək güc strukturu kimi formalaşır.
