2026-cı il dünya çempionatının ilk 1/4 final qarşılaşması Fransa millisinin inamlı qələbəsi ilə yekunlaşıb. Didye Deşamın rəhbərlik etdiyi komanda ABŞ-ın Foksboro şəhərində yerləşən “Gillette Stadium”da Mərakeşi 2:0 hesabı ilə məğlub edərək yarımfinala vəsiqə qazanıb.
Bununla Fransa ardıcıl üçüncü dünya çempionatında son dördlüyə yüksələrək Almaniyanın (1982-1990) və Braziliyanın (1994-2002) rekordunu təkrarlayıb. Üstəlik, fransızlar Mərakeşi ardıcıl ikinci mundial pley-offunda 2:0 hesabı ilə məğlub edib.
Mbappe penaltini qaçırdı, sonra hesabı açdı
Matçın ilk hissəsində hesab açılmasa da, Fransa 28-ci dəqiqədə önə keçmək imkanı əldə edib. Kilian Mbappe penaltini yerinə yetirsə də, Mərakeş qapıçısı Yassin Bunu onun zərbəsini dəf edərək komandasını oyunda saxlayıb. Bu, Mbappenin dünya çempionatları tarixində qaçırdığı ilk penalti olub.
Fasilədən sonra Fransa üstünlüyünü qollara çevirməyi bacarıb. 60-cı dəqiqədə Kilian Mbappe hesabı açıb, 66-cı dəqiqədə isə Usman Dembele fərqi iki topa çatdıraraq görüşün taleyini həll edib. Mbappe bu qolla turnirdəki qol sayını 8-ə yüksəldərək bombardirlər siyahısında Lionel Messiyə çatıb. Ümumilikdə isə bu, onun dünya çempionatlarındakı 20-ci qolu olub.
Fransa yarımfinalda İspaniya – Belçika cütünün qalibi ilə qarşılaşacaq. Mərakeş isə mundialla mübarizəni 1/4 final mərhələsində başa vurub.
