Prezident İlham Əliyev Azərbaycanda növbəti əhalinin siyahıyaalınmasının keçirilməsi ilə bağlı Fərman imzalayıb. Sənədə əsasən, 2029-cu ildə ölkə üzrə genişmiqyaslı siyahıyaalma təşkil olunacaq. Bu, Azərbaycanın ərazi bütövlüyü və dövlət suverenliyi tam bərpa edildikdən sonra bütün ölkə ərazisini əhatə edən ilk əhalinin siyahıyaalınması olacaq.
Siyahıyaalmanın əsas məqsədi ölkənin bütün yaşayış məntəqələri üzrə dəqiq demoqrafik məlumatların toplanması, sosial-iqtisadi göstəricilərin qiymətləndirilməsi və gələcək dövlət proqramlarının hazırlanması üçün etibarlı statistik bazanın formalaşdırılmasıdır.
Fərmana əsasən, siyahıyaalma 2029-cu il oktyabrın 1-dən 31-dək keçiriləcək və əsas götürüləcək tarix 1 oktyabr 2029-cu il olacaq.
Hazırlıq və təşkilati işlər, məlumatların emalı, nəticələrin ümumiləşdirilməsi və ictimaiyyətə təqdim edilməsi Dövlət Statistika Komitəsinə həvalə olunub.
Nazirlər Kabinetinə yeni tapşırıqlar verilib
Sənədə uyğun olaraq, Nazirlər Kabineti iki ay ərzində siyahıyaalmanın təşkili ilə bağlı tədbirlər planını təsdiqləməlidir. Bununla yanaşı, aidiyyəti dövlət qurumlarının informasiya sistemlərində mövcud olan məlumatların Dövlət Statistika Komitəsinin məlumat bazasına inteqrasiyası üçün zəruri tədbirlərin görülməsi də nəzərdə tutulur.
Bu yanaşmanın siyahıyaalma prosesinin daha operativ və dəqiq aparılmasına, inzibati məlumatlardan daha səmərəli istifadə edilməsinə imkan yaradacağı gözlənilir.
Qeyd edək ki, Azərbaycanda son ümummilli əhalinin siyahıyaalınması 2019-cu ildə keçirilib. 2029-cu ildə baş tutacaq növbəti siyahıyaalma isə işğaldan azad olunmuş ərazilər də daxil olmaqla ölkənin bütün ərazisini əhatə edən ilk belə statistika tədbiri olacaq və demoqrafik vəziyyətin obyektiv qiymətləndirilməsi baxımından xüsusi əhəmiyyət daşıyacaq.
