Beynəlxalq Könüllülər Gününə (5 dekabr) həsr olunmuş Azərbaycan Könüllülərinin VIII Həmrəylik Forumunda dövlət rəsmiləri könüllülüyün ölkəmizdəki inkişafından və gənclərin rolundan danışıblar.
Könüllülük – Azərbaycan xalqının əsrlər boyu davam edən ənənəsi
Prezident Administrasiyasının Gənclər siyasəti və idman məsələləri şöbəsinin sektor müdiri Həmid Nəsibov bildirib ki, könüllülük azərbaycanlıların təfəkküründə formalaşmış dəyərdir: “Kənddə, icmada, ölkə miqyasında insanlar hər zaman təmənnasız kömək ediblər. Müstəqillik dövründə Prezident İlham Əliyevin tövsiyəsi ilə dövlət qurumları öz könüllü qruplarını yaratdı. Bu gün demək olar ki, bütün qurumlarda belə qruplar uğurla fəaliyyət göstərir.”
Ədliyyə nazirinin müavini Toğrul Hüseynov əlavə edib ki, nazirlik artıq 200-dən çox gənci könüllü proqrama cəlb edib. Onlar media, icra, kargüzarlıq, insan resursları kimi 15 istiqamətdə real təcrübə qazanır və səmərəli fəaliyyət üçün bütün şərait yaradılır.
Könüllülük gənclərə karyera qapısı açır
Gənclər və idman nazirinin müavini Fərhad Hacıyev vurğulayıb: “Könüllülükdə iştirak edən gənclərin 22-27 %-i sonradan həmin qurumda və ya başqa yerlərdə işlə təmin olunur. Dövlətin heç bir qurumu gənclərə qapısını bağlamır. İstəyən hər kəs öyrənə, inkişaf edə və faydalı təcrübə toplaya bilər.”
Gənclər Fondunun icraçı direktoru vəzifəsini icra edən Yusif Vəliyev isə qeyd edib ki, könüllülük hərəkatı yeni inkişaf mərhələsinə qədəm qoyub: “2009-cu ildə qəbul olunan qanun hüquqi baza yaratdı. ASAN Könüllüləri ilə başlayan proses minlərlə gənci əhatə etdi. Onlar beynəlxalq tədbirlərdə, vətəndaş xidmətlərində fəal iştirak edir, 2020-ci il Vətən müharibəsində həm ön, həm də arxa cəbhədə böyük fədakarlıq göstərdilər. Azərbaycan gəncləri intellektual, vətənpərvər və müasir çağırışlara hazırdır.”
Forum könüllülərin birliyini nümayiş etdirdi və gələcək layihələr üçün yeni motivasiya yaratdı. Könüllü olmaq istəyənlər üçün qapılar hər zaman açıqdır!
