Sentyabrın 16-da saat 09:00-a olan məlumata görə, Azərbaycanın əksər bölgələrində hava əsasən yağmursuz keçib, lakin bəzi dağ və dağətəyi rayonlarda gün ərzində qısa müddətli yağış və ildırım hadisələri qeydə alınıb.
Bu barədə Ekologiya və Təbii Sərvətlər Nazirliyinin Milli Hidrometeorologiya Xidməti məlumat verib.
Yağışın miqdarı Göyçay, Yardımlı, Astara, Daşkəsən və Gədəbəy rayonlarında 1 mm-ə qədər olub.
Sarı xəbərdarlığa əsasən, küləyin sürəti Culfa ərazisində 21 m/s, Gəncədə 20 m/s, Göygöldə 19 m/s, Tərtərdə 18 m/s, Bakı və Abşeron yarımadasında isə 16 m/s-ə çatıb.
Şahdağ və Qrız bölgələrində duman müşahidə olunub.
Paytaxt və Abşeronda havanın maksimal temperaturu 27°C, Naxçıvan Muxtar Respublikasında 31°C, düzənlik ərazilərdə 30°C, dağlıq rayonlarda isə 19°C olub.
