Heydər Əliyev Beynəlxalq Aeroportunda növbəti illər üçün əsas inkişaf istiqaməti yeni terminal binasının inşası olacaq. Hava limanından verilən rəsmi açıqlamaya görə, layihə uzunmüddətli perspektivdə buraxılış qabiliyyətinin əhəmiyyətli dərəcədə artırılmasını hədəfləyir.
Mövcud infrastrukturun optimallaşdırılması prioritetdir
Aeroportun məlumatında bildirilir ki, yaxın dövrdə diqqət mövcud terminalların daha səmərəli şəkildə idarə edilməsinə yönəlib. Bu çərçivədə bir sıra texnoloji və struktur yenilikləri nəzərdə tutulur. Açıqlamada deyilir:
“Terminal daxilində proseslərin optimallaşdırılması, avtomatlaşdırmanın genişləndirilməsi, sərhəd və təhlükəsizlik nəzarətində müasir texniki həllərin tətbiqi, sərnişin axınının daha dəqiq tənzimlənməsi əsas hədəflərimizdir.”
Bundan əlavə, mövcud terminal binasında bəzi funksional dəyişikliklərin aparılması və infrastrukturun genişləndirilməsi hesabına faktiki buraxılış gücünün artırılması planlaşdırılır. Pik saatlarda yüklənmənin balanslaşdırılması üçün axın idarəetmə sistemlərinin yenilənməsi də gündəmdədir.
Yeni terminal hava limanına əlavə güc verəcək
Aeroportun uzunmüddətli strategiyasına əsasən, yeni terminal istifadəyə verildikdən sonra Bakı hava limanının ümumi buraxılış qabiliyyəti daha yüksək səviyyəyə çatdırılacaq:
“Yanaşmamız iki mərhələdən ibarətdir: əvvəlcə mövcud resursların maksimum effektiv istifadəsi, daha sonra isə yeni terminalın hesabına dayanıqlı və genişmiqyaslı inkişafın təmin edilməsi,” – məlumatda qeyd olunur.
Hazırda Heydər Əliyev Beynəlxalq Aeroportunda iki terminal fəaliyyət göstərir və hər iki bina həm beynəlxalq, həm də daxili uçuşlar üçün tam infrastruktur təqdim edir. Yeni terminalın inşası isə sərnişin yükünün artdığı bir dövrdə hava limanının imkanlarını daha da genişləndirəcək.
