Bakı-Abşeron və Sumqayıt sahillərində aşkarlanan quş cəsədləri ilə bağlı aparılan laborator analizlər hər hansı xüsusi heyvan xəstəliyinin qeydə alınmadığını göstərib. Məsələ ilə bağlı rəsmi məlumatı Azərbaycan Qida Təhlükəsizliyi Agentliyi (AQTA) yayıb.
Sahilboyu ərazilərdə genişmiqyaslı araşdırma aparılıb
AQTA bildirir ki, mediada çöl quşlarının kütləvi tələf olması barədə yayılan xəbərlərdən sonra Agentliyin regional əməkdaşları, Bioloji Müxtəlifliyin Qorunması Xidməti və Aqrar Xidmətlər Agentliyinin mütəxəssisləri sahilboyu ərazilərdə monitorinq həyata keçiriblər.
Baxış zamanı tapılan cəsədlərdən material götürülərək laborator müayinələrə göndərilib. Aparılan sınaqlar nəticəsində quşlarda quş qripi, Nyukasl xəstəliyi və digər yüksək yoluxucu infeksiyalar daxil olmaqla, hər hansı patoloji hal aşkar edilməyib.
Mütəxəssislər bildirir ki, bu tip tələf hallarının bir çox səbəbi ola bilər – hava şəraiti, təbii ölüm, qida çatışmazlığı və ya yırtıcıların hücumu kimi faktorlar istisna edilmir.
Xaçmazda aşkarlanan yeni hallar araşdırılır
Sahildə quş cəsədlərinə rast gəlinməsi ilə bağlı son məlumatlardan biri Xaçmaz rayonunun Niyazabad kəndi yaxınlığında qeydə alınıb. Hazırda həmin ərazi də aidiyyəti qurumlar tərəfindən yoxlanılır.
AQTA əməkdaşları tərəfindən götürülən nümunələr üzərində diaqnostik testlər aparılır və qurum yaxın zamanda nəticələr barədə ictimaiyyətə əlavə məlumat verəcəyini açıqlayıb.
