“Dünya üzrə istixana qazı tullantılarının 80 faizi G20 ölkələrinin payına düşür. Siz qəzəblənməkdə haqlısınız və mən də qəzəblənirəm. Bu ədalətsizlik səbəbindən dəniz səviyyəsinin yüksəlməsi adalarınızın gələcəyini təhlükə altına qoyur, sakinlər təbii fəlakətlərdən əziyyət çəkir, iqtisadiyyat ciddi şəkildə zərər görür. Bu ədalətsizliyə son qoyulmalıdır,” – deyə BMT baş katibi Antonio Quterreş Bakıda COP29 çərçivəsində Kiçik Ada İnkişaf Edən Dövlətlərin (SIDS) iqlim dəyişikliyinə həsr olunmuş Liderlər Sammitində çıxış edərkən bildirdi.
Onun sözlərinə görə, dünya bu ölkələri dəstəkləməli, milli iqlim fəaliyyət planları hazırlamalıdır ki, bu da 2030-cu ilə qədər qlobal tullantıları ildə 9 faiz azalda bilər.
BMT baş katibi vurğulayıb ki, kiçik ada dövlətləri iqlim böhranının yaranmasında rol oynamadıqları halda, dəstəyə layiqdirlər. Bunun üçün uğurlu iqlim maliyyələşməsi razılaşmasına ehtiyac var.
