Son illər Azərbaycanda daşınmaz əmlak bazarında qiymət artımı aktiv şəkildə davam edir. Azərbaycan Qiymətləndiricilər Cəmiyyəti (AQC) sədrinin verdiyi məlumata görə, əvvəlki aya nisbətən ortalama qiymətlər 1-1,5% arasında artıb, bəzi yerlərdə isə təməl tikililərdə bu artım 3%-ə çatır.
Vüqar Oruc bildirib ki, qiymət artımına təsir edən əsas amillərdən biri enerji pasportlarının tətbiqi, binaların söküntüsü prosesləri və Bakı Şəhər Baş Planının həyata keçirilməsidir. Eyni zamanda, ölkə iqtisadiyyatının güclənməsi və manatın alıcılıq qabiliyyətindəki dəyişikliklər də bazar fəallığını artırır.
Bazarda əsas tələbin kirayə seqmentində olduğunu vurğulayan AQC sədri, ehtiyac yaşayan vətəndaşların müvəqqəti olaraq kirayə bazarına müraciət etdiyini qeyd edib. Bundan başqa, kompensasiya almaq hüququ olan şəxslər yeni mənzil almağa yönəlirlər. İpoteka və Kredit Zəmanət Fondu isə il boyunca vətəndaşlara kredit ayırır ki, bu da bazarın aktivliyini daha da artırır.
Vüqar Oruc ilin sonuna qədər bahalaşma tendensiyasının davam edəcəyini proqnozlaşdırır. Ötən ilin müvafiq dövrü ilə müqayisədə torpaq qiymətləri 18%, qeyri-yaşayış sahələri 14%, fərdi evlər 14,5%, köhnə tikililər 11,5%, yeni tikililər 16,3%, təməl tikililər isə 17,4% bahalaşıb. Ortalama qiymət artımı isə 15-16% arasında dəyişir.
Abşeron yarımadasında isə qiymətlərin artımı infrastruktur və tələbat amillərinə görə dəyişiklik göstərir. Hər ay daşınmaz əmlakın kvadratmetr qiyməti 70-120 manat arasında yüksəlir.
