Fövqəladə Hallar Nazirliyi (FHN) avtomobil sürücülərinə vacib xəbərdarlıq edib.
“Report”a verilən məlumata görə, Nazirlikdən edilən müraciətdə deyilir ki, yay istirahət mövsümünün və məktəblilərin tətilinin sona çatması ilə şəhərin yollarında nəqliyyat sıxlığı artmaqdadır. Bu vəziyyət fövqəladə hallar zamanı hadisə yerinə doğru hərəkət edən xüsusi təyinatlı avadanlıqların, xüsusilə yanğınsöndürmə və xilasetmə maşınlarının yollarda irəliləməsinə ciddi maneələr yaradır. Bəzi sürücülərin bu cür təcili nəqliyyat vasitələrinə yol verməməsi, yanğınlar, qəza və digər təcili hadisələr zamanı vəziyyətin vaxtında idarə olunmasına və zərərlərin minimuma endirilməsinə əngəl olur.
Nazirlik sürücüləri xəbərdar edir ki, belə davranışlar təkcə qanunla müəyyən edilmiş qaydada hüquqi məsuliyyət yaratmır, eyni zamanda hadisələrin vaxtında qarşısının alınmasına və ən önəmlisi, insan həyatının xilas edilməsinə mənfi təsir göstərərək mənəvi məsuliyyət yaradır.
Bu səbəbdən hər bir sürücüdən tələb olunur ki, məsuliyyətini dərk edərək, operativ nəqliyyat vasitələrinə, yanğınsöndürmə və xilasetmə maşınlarına dərhal yol versin.
