Rəqəmsal ödənişlər dövründə səhvən başqa karta pul köçürmələri artmaqda davam edir. Son zamanlar bir vətəndaşın sosial şəbəkələrdə paylaşdığı hadisə bu məsələnin aktual olduğunu göstərir. Vətəndaş səhvən 800 manatını başqa karta köçürüb, son rəqəmləri qarışdıraraq (8595 əvəzinə 8995).
Məsələ daha da çətinləşib, çünki pulu alan şəxs artıq məbləği xərcləyib və onu geri qaytarmaqdan imtina edir. Bank məhkəmə qərarı tələb edir, dövlət qurumu isə alıcının şəxsi məlumatları olmadan işi qəbul edə bilməyəcəyini bildirir.
Bank mütəxəssisi və hüquqşünas Əkrəm Həsənov bu kimi hallarda nə ediləcəyini izah edib:
“Problemin həlli üçün addımlar:
- İlk növbədə, vəsaiti alan şəxslə əlaqə yaratmaq məqsədilə banka müraciət edin.
- Əgər alıcı könüllü şəkildə pulu qaytarmırsa, məhkəməyə müraciət edin.
- Məhkəmə, adətən, bu hallarda göndəricinin xeyrinə qərar qəbul edir və məhkəmə xərclərinin ödənilməsini də tələb edir,” – deyə Ə. Həsənov bildirib.**
Əgər məhkəmə alıcının məlumatlarının olmaması səbəbindən iddianı qəbul etmirsə, mütəxəssis bankı məhkəməyə verməyi tövsiyə edir. Məhkəmə bankdan rəsmi qaydada lazımi məlumatları tələb edə bilər və bundan sonra cavabdeh şəxs olaraq vəsaiti alan şəxs müəyyən edilə bilər.
