Bakıda və digər şəhərlərdə avtobus zolaqlarında minik avtomobilləri üçün yeni imkanlar yaradılır. Belə ki, sərnişinlərin minib-düşməsi üçün xüsusi yerlər ayrılacaq. Daylinews-az.com xəbər verir ki, bu barədə məlumatı Azərbaycan Yerüstü Nəqliyyat Agentliyi (AYNA) yayıb.
Agentliyin açıqlamasında bildirilir ki, bu dayanma yerləri əsas cəlbetmə nöqtələrində, yəni insanların daha çox istifadə etdiyi ərazilərdə təşkil olunacaq. Burada həm nəqliyyat vasitələrinin rahat manevr etməsi, həm də sərnişinlərin təhlükəsizliyi əsas meyar kimi nəzərə alınıb.
AYNA-nın verdiyi məlumata görə, yeniliyin məqsədi avtobus zolaqlarının hərəkətinə mane olmadan sərnişinlərin rahat şəkildə minik avtomobillərinə minib-düşməsini təmin etməkdir.
Bu addım şəhərdaxili nəqliyyatda nizam-intizamın artırılması və ictimai nəqliyyatın fasiləsiz hərəkətinə şərait yaradılması baxımından mühüm əhəmiyyət daşıyır.
