Süni intellekt əsasında hazırlanan deepfake məzmunu və sintetik media məhsulları uşaqların təhlükəsizliyi baxımından ən ciddi rəqəmsal risklərdən biri hesab olunur. Bu barədə Milli Məclisin Xarici müdaxilələrə və hibrid təhdidlərə qarşı müvəqqəti komissiyasının sədri Ramid Namazov parlamentdə keçirilən “Rəqəmsal inkişaf, süni intellekt və uşaqların sosial şəbəkələrdə zərərli təsirlərdən qorunması” mövzusunda ictimai dinləmələrdə danışıb.
Deputatın sözlərinə görə, müasir süni intellekt alətləri artıq həqiqətdən seçilməsi olduqca çətin olan saxta video, audio və vizual materiallar hazırlaya bilir. Belə məzmunun sosial şəbəkələrdə sürətlə yayılması isə bəzən dövlət qurumlarının və faktların yoxlanılması mexanizmlərinin operativ reaksiya imkanlarını üstələyir.
Deepfake artıq hibrid təhdidlərin tərkib hissəsi sayılır
Ramid Namazov bildirib ki, deepfake texnologiyası artıq sadəcə texnoloji yenilik deyil, müasir hibrid təhdidlərin ən mürəkkəb alətlərindən birinə çevrilib.
“Bu, sadəcə maraqlı texnoloji fenomen deyil. Deepfake və süni intellekt vasitəsilə hazırlanan dezinformasiya artıq ənənəvi kibertəhdidlərlə yanaşı hibrid təhlükələrin ayrılmaz hissəsi kimi qiymətləndirilməlidir. Bu texnologiyalar ictimai etimadı sarsıtmaq, dövlət qurumlarının nüfuzuna zərbə vurmaq, insanları, xüsusilə də uşaqları aldatmaq və manipulyasiya etmək üçün istifadə oluna bilər”, – deyə o vurğulayıb.
Deputat əlavə edib ki, süni intellekt və dezinformasiyanın yaratdığı risklər artıq ayrıca təhlükə kateqoriyası kimi nəzərdən keçirilməlidir.
Azərbaycanda son aylarda uşaqların rəqəmsal mühitdə qorunması istiqamətində bir sıra ictimai müzakirələr keçirilib. Müzakirələrdə rəqəmsal savadlılığın artırılması, kibertəhlükəsizlik bacarıqlarının inkişaf etdirilməsi və sosial şəbəkələrdən məsuliyyətli istifadənin təşviqi əsas prioritetlərdən biri kimi göstərilib. Bu kontekstdə sosial şəbəkə asılılığı mövzusu da xüsusi diqqət çəkir və uşaqların rəqəmsal təhlükələrə qarşı daha həssas olduğunu göstərir.
