2026-cı ilin yanvar ayı üzrə dövlət büdcəsinin icrası müsbət nəticələrlə başa çatıb. Xəzinədarlıq orqanları ay ərzində 37 mindən artıq ödəniş əməliyyatını icra edib və büdcə gəlirləri proqnozu qabaqlayıb.
Maliyyə Nazirliyinin məlumatına görə, yanvar ayında dövlət büdcəsinə 3 707,3 milyon manat daxil olub. Bu məbləğ müəyyən edilmiş aylıq planı 32 milyon manat və ya 0,9 faiz üstələyib.
Gəlirlərin mənbələri üzrə bölgü belədir:
- Dövlət Vergi Xidməti: 2 050,3 milyon manat (proqnozdan 50,3 milyon manat çox)
- Dövlət Gömrük Komitəsi: 487 milyon manat (proqnozdan 2 milyon manat çox)
- Əmlak Məsələləri Dövlət Xidməti: 4,9 milyon manat (proqnozu 0,2 milyon manat üstələyib)
- Sair daxilolmalar: 31 milyon manat (proqnozdan 3,1 milyon manat artıq)
- Dövlət Neft Fondu transfertləri: 1 070 milyon manat (tam icra edilib)
Büdcədən maliyyələşən qurumların göstərdiyi ödənişli xidmətlərdən əldə olunan vəsait 64,1 milyon manat təşkil edib ki, bu istiqamətdə plan 73,1 faiz yerinə yetirilib.
Yanvar ayında dövlət büdcəsinin xərcləri 1 437,6 milyon manat olub və bu göstərici 1 500 milyon manatlıq aylıq proqnozun 95,8 faizi səviyyəsində icra edilib.
Hesabat dövründə icmal büdcənin gəlirləri 4 411,9 milyon manat, xərcləri isə 1 717,5 milyon manat təşkil edib.
