Mərkəzləşdirilmiş qəbul imtahanı ilə şagird qəbul edən lisey və gimnaziyalara seçim mərhələsinə start verilib. Azərbaycan Respublikasının Təhsil İnstitutunun məlumatına əsasən, qəbul imtahanının nəticələri artıq iştirakçıların şəxsi kabinetlərində yerləşdirilib və namizədlər təhsil müəssisəsi seçiminə başlaya bilərlər.
Seçim prosesi iyulun 8-də saat 11:00-da başlayıb və iyulun 14-də saat 12:00-dək davam edəcək. Namizədlər seçimlərini şəxsi kabinetdə yerləşən “İmtahanlar” bölməsinin “Lisey seçimi” hissəsi vasitəsilə edə bilərlər.
Seçim zamanı nələrə diqqət yetirilməlidir?
Bu mərhələdə hər bir namizəd maksimum üç lisey və ya gimnaziya seçə bilər. Lakin üç seçim etmək məcburi deyil. Valideynlərə və şagirdlərə yalnız həqiqətən təhsil almaq istədikləri təhsil müəssisələrini qeyd etmələri tövsiyə olunur.
Qəbul olunan şagirdlər üçün elektron yerdəyişmə sistemi avtomatik şəkildə aktivləşdiriləcək və müvafiq köçürülmə sorğusu yaradılacaq. Sənədlərin qəbulunun isə avqust ayının ilk yarısında həyata keçirilməsi planlaşdırılır.
Mərkəzləşdirilmiş qəbul imtahanı ölkənin 41 imtahan mərkəzində təşkil olunub və prosesdə 7 minə yaxın şagird iştirak edib. Təhsil İnstitutu bildirir ki, imtahan bütün mərkəzlərdə uğurla baş tutub.
İmtahan nəticələri ilə bağlı irad və ya müraciəti olan namizədlər iyulun 10-u saat 17:00-dək rəsmi ərizə formasında [email protected] elektron poçt ünvanına müraciət edə bilərlər.
