Avropa ölkələrində qısa məsafəli səfərlərdə dəmir yoluna üstünlük verilməsi nəqliyyat siyasətinin əsas istiqamətlərindən birinə çevrilib. Məqsəd karbon emissiyalarını azaltmaq, enerji resurslarından daha səmərəli istifadə etmək və dayanıqlı nəqliyyat sistemini inkişaf etdirməkdir. Avropa İttifaqı da bu istiqamətdə müxtəlif təşəbbüsləri dəstəkləyir və bir sıra ölkələr qatarla rahat qət edilən marşrutlarda hava nəqliyyatından asılılığı azaltmağa çalışır.
Qatarların sərnişin tutumu daha yüksəkdir
Nəqliyyat məsələləri üzrə ekspert Rauf Ağamirzəyev bildirib ki, Azərbaycanın müasir aviasiya və dəmir yolu parkı bu iki nəqliyyat növünü müqayisə etmək üçün maraqlı nümunə yaradır.
Onun sözlərinə görə, AZAL-ın istismar etdiyi sərnişin təyyarələrinin tutumu belədir:
- Boeing 787-8 Dreamliner – 210 sərnişin
- Boeing 767-300ER – 198 sərnişin
- Airbus A320neo – 186 sərnişin
- Airbus A320-200 – 146–174 sərnişin
- Airbus A319-100 – 122 sərnişin
- Embraer E190 – 106 sərnişin
“Azərbaycan Dəmir Yolları”nın parkında isə daha böyük tutuma malik qatarlar fəaliyyət göstərir:
- Stadler KISS – 480 sərnişin
- Stadler FLIRT EMU/DMU – 236–270 sərnişin
- Yataq tipli Stadler – 237 sərnişin
- Ammendorf vaqonları – 189 sərnişin
Ekspert vurğulayıb ki, Stadler KISS qatarı bir reysdə AZAL-ın ən iri sərnişin təyyarəsi olan Boeing 787-8 Dreamliner ilə müqayisədə iki dəfədən artıq sərnişin daşıya bilir. Bu da daxili və yaxın məsafəli marşrutlarda dəmir yolunun yüksək daşıma potensialına malik olduğunu göstərir.
Hansı nəqliyyat növü hansı marşrut üçün uyğundur?
Rauf Ağamirzəyevin sözlərinə görə, qatar və təyyarə bir-birini əvəz edən deyil, tamamlayan nəqliyyat növləridir. O bildirib ki, təyyarələr uzun məsafələr və beynəlxalq uçuşlarda sürət üstünlüyü təqdim edir. Dəmir yolu isə şəhər mərkəzlərini birbaşa əlaqələndirməsi, yüksək sərnişin tutumu, daha aşağı karbon emissiyası və rahat səyahət imkanı ilə seçilir.
Ekspert hesab edir ki, Azərbaycanın həm müasir hava donanmasına, həm də yenilənmiş dəmir yolu parkına malik olması gələcəkdə marşrutların daha səmərəli planlaşdırılmasına, sərnişin axınının optimal bölüşdürülməsinə və ölkənin dayanıqlı nəqliyyat strategiyasının inkişafına mühüm töhfə verə bilər.
